Lög St.Rv.

1. gr. 
Nafn félagsins er Starfsmannafélag Reykjavíkurborgar (skammstafað St.Rv.).

2. gr. 
Félagið er stéttarfélag. Félagið skiptist í tvo hluta, A-hluta og B-hluta.
Í A-hluta eru starfmenn Reykjavíkurborgar, stofnana hennar og aðrir opinberir starfsmenn, sem taka laun skv. kjarasamningum, sem St.Rv. hefur gert við Reykjavíkurborg og aðra opinbera aðila á grundvelli laga um kjarasamninga opinberra starfsmanna nr. 94/1986. Tekur þetta einnig til starfsmanna sem vinna hluta úr starfi.
Í B-hluta eru einstaklingar, sem starfa hjá stofnunum eða fyrirtækjum, sem starfa í almanna þágu og hafa verið í eigu borgarinnar en eru nú rekin af öðrum aðilum svo og þeir, sem starfa hjá stofnunum eða fyrirtækjum í almannaþjónustu. Tekur þetta einnig til starfsmanna, sem vinna hluta úr starfi.
Þá geta átt aðild að félaginu starfsmenn og stjórnarmenn þess, sem ekki eiga rétt til aðildar að A- eða B-hluta sem og félagsmenn sem ráðast til starfa hjá BSRB.
Félagssvæðið er höfuðborgarsvæðið, þ.e. Reykjavík, Kópavogur, Hafnarfjörður, Akranes og aðliggjandi sveitarfélög.
Lög nr. 94/1986 gilda um starfsemi A-hluta félagsins við gerð kjarasamninga en lög nr. 80/1938 gilda um kjarasamningsgerð B-hluta félagsins.

3. gr. 
Tilgangur félagsins er m.a.:

1. Að fara með fyrirsvar þeirra starfsmanna, sem það hefur samningsumboð fyrir og aðrar ákvarðanir af hendi starfsmanna skv. lögum um kjarasamninga opinberra starfsmanna (nr.94/1986) og lögum um stéttarfélög og vinnudeilur (nr.80/1938).
2. að gæta hagsmuna félaga sinna launalega, félagslega og faglega, t.d. um starfskjör, eftirlaun og önnur réttindi, sem og skyldur.
3. að vinna að bættum samhug félaga sinna með aukinni kynningu þeirra, jafnrétti og samhjálp eftir því sem föng eru á.
4. að vinna að aukinni fræðslu og menningarstarfsemi.
5. að vinna að bættri félagslegri aðstöðu.
6. að stuðla að auknu samstarfi launafólks.

Félagið tekur ekki afstöðu til stefnu stjórnmálaflokka.

4. gr. 
Hver sá félagi, sem ekki gegnir lengur starfi á samningssviði St.Rv. missir öll félagsréttindi frá sama tíma.Úrsögn úr félaginu skal vera skrifleg og getur fyrst tekið gildi 3 mánuðum eftir að hún berst.
Félagsmenn sem verða atvinnulausir skulu halda félagsaðild og þeim réttindum, sem er á færi félagsins að veita þeim á meðan þeir eru atvinnulausir. Atvinnulausir greiði félagsgjald, en heimilt er stjórn félagsins að fella það niður að hluta eða öllu leyti. Stjórn og fulltrúaráð fer með málefni atvinnulausra félagsmanna á milli aðalfunda.
Félagsmaður, sem lætur af starfi á aldursmörkum eða vegna veikinda, og hefur unnið sér rétt til eftirlauna eða örorkubóta, heldur öllum félagsréttindum, en skal vera gjaldfrjáls. Félagar geta óskað þess, að stjórn félagsins hafi afskipti af ráðningarkjörum, starfskjörum, eftirlaunum, brottvikningu og öðru því, sem máli skiptir í samræmi við tilgang félagsins.

5. gr.
Félagsmönnum er skylt að gefa stjórn félagsins allar nauðsynlegar upplýsingar í samræmi við tilgang félagsins.

6.gr.
Félagið skiptist í starfsdeildir. Skal skipting og starfssvið þeirra ákveðið af aðalfundi að fengnum tillögum stjórnar og fulltrúaráðs.
Hver starsdeild kýs sér fulltrúa, sem ásamt stjórn félagsins mynda fulltrúaráð þess.
Fulltrúar hverrar starfsdeildar í A-hluta félagsins sem og B-hluta þess eru trúnaðarmenn samstarfsmanna sinna, annars vegar þeir, sem kosnir eru skv. 5. kafla laga nr. 94/1986 um kjarasamninga opinberra starfsmanna, ásamt öðrum trúnaðarmönnum, sem kosnir kunna að verða skv. þeim lögum og hins vegar þeir, sem kosnir eru skv. lögum nr. 80/ 1938. Sá fulltrúi, sem flest atkvæði fær við fulltrúakjör telst fyrsti fulltrúi deildarinnar. Fulltrúar skulu halda tengslum við stjórn félagsins, efla þróun þess og vinna að innbyrðis samstöðu félagsmanna og hafa forystu um að kynna og ræða, innan deildanna þau mál, sem fulltrúaráðið hefur til meðferðar á hverjum tíma.
Hver starfsdeild hefur rétt til að kjósa tvo fulltrúa fyrir allt að 100 félagsmenn og síðan einn fulltrúa fyrir hverja 50 félagsmenn eða brot úr fimm tugum. Deild eftirlaunafólks skal þó að hámarki kjósa 7 fulltrúa. Kjósa skal jafnmarga fulltrúa til vara. Fulltrúar skulu kosnir til tveggja ára í senn.
Kosning til fulltrúaráðs skal fara fram innan hverrar starfsdeildar dagana 15.- 30. október. Í hið fyrsta sinn árið 2003. Kosning skal vera leynileg. Stjórn félagsins leggur til kjörgögn og skipar kjörstjóra innan hverrar deildar, sem sjá um framkvæmd kosningarinnar. Talning atkvæða skal fara fram í skrifstofu félagsins að viðstöddum fulltrúum stjórnarinnar, en úrslit kunngerð með orðsendingu eða fréttabréfi til félagsmanna.
Heimilt er starfsdeildum að breyta kosningafyrirkomulagi til fulltrúaráðs til jöfnunar fulltrúa milli starfshópa eða vinnustaða, að höfðu samráði við yfirkjörstjórn.
Stjórn félagsins er skylt að tilkynna viðsemjendum og forstöðumönnum stofnana um kjör fulltrúa og annarra trúnaðarmanna viðkomandi deildar.
Fulltrúaráð starfar eftir starfsreglum, staðfestum af aðalfundi.

7. gr.
Stjórn félagsins er skipuð 11 mönnum, og er jafnframt framkvæmdastjórn.
Stjórn félagsins er skylt að leita álits fulltrúaráðs um öll meiri háttar hagsmuna-, stefnu- og félagsmál hverju sinni.
Stjórnin skal kosin beinni kosningu samkv. uppástungum, að viðhafðri allsherjaratkvæðagreiðslu, minnst hálfum mánuði fyrir aðalfund. Formaður skal kosinn til tveggja ára í senn, er hann jafnframt formaður fulltrúaráðsins. Meðstjórnendur skulu kosnir 5 í einu til tveggja ára, og ganga árlega úr stjórninni á víxl.
Í byrjun hvers árs kýs fulltrúaráðið uppstillinganefnd, skipaða einum manni úr hverri starfsdeild, og kýs nefndinni formann, heimilt er að kjósa jafnmarga varamenn.
Nefndin skal gera tillögur um framboð til stjórnarkjörs, skoðunarmenn og fulltrúa á þing BSRB aðra en stjórnarmenn, sem eru sjálfkjörnir. Hún skal skila tillögum sínum fyrir 1. febrúar.
Öðrum framboðum en nefndarinnar til stjórnarkjörs skulu fylgja skrifleg meðmæli minnst 75 lögmætra félagsmanna. Verði ekki fleiri í kjöri en kjósa á, eru þeir sjálfkjörnir án atkvæðagreiðslu.
Stjórnin skipar kjörstjórn, sem annast undirbúning og framkvæmd kosningarinnar, samkvæmt reglum félagsins um allsherjaratkvæðagreiðslu um stjórnarkjör.
Stjórnin skiptir með sér verkum og kýs úr sínum hópi varaformann, ritara og gjaldkera. Stjórnarfundur er lögmætur sé meirihluti stjórnar mættur.
Stjórnin tilnefnir fulltrúa félagsins í starfskjaranefnd.
Aðalfundur kýs tvo skoðunarmenn og einn til vara.

8. gr.
Formaður er aðalforsvarsmaður félagsins. Hann kallar saman stjórnar- og fulltrúaráðsfundi, auglýsir félagsfundi og skipar fundarstjóra og fundarritara. 
Varaformaður gegnir störfum formanns í forföllum hans og er honum jafnframt til aðstoðar við lausn mála.
Ritari heldur gerðabók og færir í hana fundargerðir stjórnar- og annarra funda.
Gjaldkeri varðveitir alla fjármuni félagsins og sérsjóða þess, nema annað sé ákveðið í skipulagsskrá þeirra. Allt handbært fé skal geymt í banka eða á annan hátt, sem stjórn og fulltrúaráð ákveður. Gjaldkeri greiðir alla reikninga eftir að formaður hefur áritað þá og leggur fram endurskoðaða ársreikninga á aðalfundi. Ennfremur gerir gjaldkeri fjárhagsáætlun fyrir næsta ár, sem hann kynnir á aðalfundi.
Stjórnin ákveður fjölda starfsmanna að fengnu samþykki fulltrúaráðs.
Stjórnin sér um ráðningu starfsmanna og gerir við þá ráðningarsamninga.

9. gr.
Stjórn og fulltrúaráð félagsins taka ákvörðun um uppsögn hvers kjarasamnings á tilsettum tíma fyrir lok gildistíma hans. 
Sex mánuðum fyrir lok gildistíma kjarasamnings skal velja menn í samninganefnd. Formaður félagsins er formaður samninganefnda og ásamt honum sitja fulltrúar úr stjórn skv. ákvörðun stjórnarinnar. Stjórn getur valið jafn marga varamenn. 
Sé kjarasamningur gerður á grundvelli laga nr. 94/1986 skulu sitja í samninganefnd, auk fulltrúa stjórnar félagsins, einn maður frá hverri starfsdeild í A-hluta félagsins. Stjórnin skipar þessa menn, auk varamanna, að fengnum tillögum deildanna.
Stjórn og fulltrúaráð, ásamt samninganefnd, taka ákvörðun um allsherjaratkvæðagreiðslu um boðun verkfalls og fer um framkvæmd skv. 15. gr. laga nr. 94/1986. Framkvæmd verkfallsboðunar skal vera í höndum stjórnar og samninganefndar.
Viðhafa skal allsherjaratkvæðagreiðslu við afgreiðslu kjarasamnings. Heimilt er þó stjórn og samninganefnd félagsins að afgreiða kjarasamning á almennum félagsfundi.

Þeir félagsmenn einir hafa rétt til þátttöku í atkvæðagreiðslu um boðun verkfalls og afgreiðslu kjarasamnings, sem kjarasamningurinn nær til og starfa hjá þeim vinnuveitenda/ vinnuveitendum, sem krafan um kjarasamning beinist að.
Þeir félagsmenn, sem skv. lögum nr. 94/1986, kunna að öðlast sjálfstæðan samningsrétt við Reykjavíkurborg eiga ekki rétt á að fjalla um kjarasamninga annarra félagsmanna.
Sé kjarasamningur gerður á grundvelli laga nr. 80/1938 skulu sitja í samninganefnd, auk fulltrúa stjórnar félagsins, fulltrúar starfsdeilda í B-hluta félagsins, skv. skipun stjórnar.

Við túlkun og framkvæmd þessarar greinar og annarra greina laganna skal það haft í huga að innan félagsins eru annars vegar félagsmenn sem starfa eftir kjarasamningum sem gerðir eru skv. lögum um kjarasamninga opinberra starfsmanna nr. 94/1986 og hins vegar félagsmenn, sem starfa á almennum vinnumarkaði, þar sem um gerð kjarasamninga gilda lög nr. 80/1938.
Ákvarðanir í kjaralegu tilliti, sem fara eftir lögum nr. 94/1986 eða nr. 80/1938, verða aðeins teknar af þeim, sem starfa hjá þeim vinnuveitenda eða vinnuveitendum, sem samningurinn nær til. Heimilt er að framkvæma allsherjaratkvæðagreiðslu með atkvæðagreiðslu á  kjörstað/kjörstöðum, með póstatkvæðagreiðslu eða rafrænt.

10. gr.
Heimilt er stjórninni að leita skriflegrar atkvæðagreiðslu allra félagsmanna um þau mál, sem þykja mikilsvarðandi fyrir félagið. Á undan slíkri atkvæðagreiðslu skal halda almennan félagsfund og málið skýrt fyrir félagsmönnum.
11. gr.
Boða skal til félagsfundar svo oft, sem stjórnin og fulltrúaráðið telur þörf á.
Þá getur 1/10 félagsmanna skriflega krafist þess, að almennur félagsfundur verði haldinn og skulu þeir tilgreina fundarefni. Er þá formanni skylt að boða til fundar innan 7 daga frá því að honum barst krafan.

12. gr.
Félagsfundi skal boða með minnst þriggja sólarhringa fyrirvara, nema brýna nauðsyn beri til annars, að dómi stjórnar. Auglýsa skal fundina á vinnustöðum og í fjölmiðlum.
Jafnan skal tilgreina í fundarboði fundarefni. Aðalfundur jafnt og almennir félagsfundir eru lögmætir, sé til þeirra boðað samkvæmt fyrirmælum þessarar greinar.
Takist ekki að ljúka fundarstörfum á einum fundi, skal boða til framhaldsfundar svo fljótt sem kostur er og eigi síðar en innan 20 daga.

13. gr.
Aðalfundur er æðsta vald félagsins, skal hann haldinn eigi síðar en 10. mars ár hvert.

Sérstök verkefni aðalfundar eru:

1. Formaður flytur skýrslu um félagsstarfið á liðnu starfsári.
2. Lagðir fram endurskoðaðir ársreikningar félagsins og sérsjóða. Kynnt fjárhagsáætlun fyrir næsta ár.
3. Tillögur til lagabreytinga, enda hafi þær verið kynntar
   á fulltrúaráðsfundi og borist stjórn félagsins fyrir janúarlok.
4. Tekin ákvörðun um árgjöld félagsmanna.
5. Tilkynnt kosningaúrslit til stjórnar.
6. Kosning skoðunarmanna samkv. 7. gr.
7. Kosning fulltrúa á þing B.S.R.B.
8. Kosning eins fulltrúa í stjórn Styrktarsjóðs.
9. a) Kosning þriggja manna í stjórn Vinnudeilusjóðs og tveir til 
   vara.
   b) Kosning tveggja manna í stjórn Orlofsheimilasjóðs.
10. Önnur mál, sem fram koma á fundinum.

14. gr.
Fundum skal stjórna eftir samþykktum fundarsköpum félagsins. Við afgreiðslu almennra mála nægir einfaldur meirihluti.
Við breytingar á lögum og reglum félagsins, en þær má aðeins gera á aðalfundi, þarf 3/4 greiddra atkvæða fundarmanna til þess að lög-mætar séu.
Ef fleiri en einn fá sama atkvæðamagn við kosningu, skal hlutkesti ráða úrslitum. Heimilt er að viðhafa listakosningu, ef þess er óskað. Tillögur fyrir aðalfund, sem eru fjárhagslega bindandi fyrir félagið,skulu hafa borist stjórninni fyrir janúarlok og kynntar á fulltrúaráðsfundi fyrir aðalfund.

15.gr.
Reikningsár félagsins er almanaksárið.
Til þess að standa straum af kostnaði við starfsemi félagsins,greiða félagsmenn árgjald til þess, samkvæmt ákvörðun aðalfundar, og skal miðast við hundraðshluta heildarlauna. Félagsmönnum ber að greiða sérstakt árgjald til B.S.R.B. samkvæmt ákvörðun bandalagsþings.
Árgjald takist hlutfallslega af launum í hverjum mánuði.

16.gr.
Félagið má ekki leysa upp, nema 3/4 fulltrúaráðs samþykki og aðalfundur félagsins staðfesti þá samþykkt með sama atkvæðamagni, enda hafi þess verið getið í fundarboði beggja funda, að fyrir lægi tillaga um félagsslit. Eignum félagsins skal þá ráðstafað til sérsjóða þess, sem starfa áfram samkvæmt skipulagsskrá þeirra. 
Bækur og skjöl félagsins skal fela Skjalasafni Reykjavíkurborgar, til verndar og varðveislu.

Samþykkt í mars 1977 og mars 1981.
Samþykkt í mars 1987 og mars 1990.
Samþykkt í mars 1992 og mars 1994.
Samþykkt í mars 1998 og mars 1999.
Samþykkt í mars 2000 og mars 2002.
Samþykkt í mars 2003.
Samþykkt í mars 2006.
Samþykkt í desember 2006.  
Samþykkt í mars 2007
Samþykkt í mars 2012